Article de David Grosclaude, Cap Redactor de « La Setmana » n°732 deu 24 au 30/09/09

Lo ministre de l’ecologia a presentat son plan per melhorar lo transpòrt de merça pels trins. França a pres fòrça retard.

Mentre qu’anóncian que la SNCF perdrà encara ongan 600 milions sul transpòrt de merças, lo ministre de l’ecologia ditz que l’Estat investirà 7 miliards en dètz ans per melhorar las infraestructuras ferroviàrias que permetràn de transportar mai de merças pel tren. S’agís de temptar de redusir l’invasion pels camions.

La reduccion de las emissions de CO2 passa per aquela revolucion. Mas lo problèma es ara l’incapacitat de la SNCF a rendre un servici atal mentre que dins d’autres païses d’Euròpa aquò fonciona e rapòrta.

Fa ja de temps que Soïssa e Austria cargan de camions suls trens per limitar lo nombre de camions sus las rotas e autorotas.Autorota ferroviari Lux / Cat

Per contrar l’autorota-bitumi i a l’autorota ferroviària que los alemands apèlan « rola ». lo concèpte es simple. S’agís de metre de camions suls trins quand devon far de grandas distàncias. Actualament circulan de Perpinhan a Luxemborg dos trens per jorn ! Quasi res. Las infraestructuras devon èstre adaptadas. Las ambicions son pasmens limitadas. lo ministèri anóncia coma objectiu dètz trens per jorn en 2015.

Per aquò far calrà metre 1,6 miliards sus la linha entre Perpinhan e Luxemborg que passa per Montepelhièr. Cal crear la desviacion de Montpelhièr e Nimes. Es dins los projèctes prioritaris. L’autorota ferroviària es tanben en plaça per passar los Alps e anar en Italia. Serà devolopada tanben.

Cada autorota deuriá permetre de portar en 2015 quicòm coma 100 000 camions per an.

Lo projècte màger es la creacion d’una autorota ferroviària que partirà de Baiona passarà per Bordèu e arribarà a Lille. Aquela autorota serà mesa en servici en 2011 se tot va plan.

L’objectiu final en 2020 es de metre 500 000 camions per an suls trens.

Mas d’autras mesuras devon èstre presas en defòra de metre los camions suls trens. Cal melhorar lo transpòrt sus de vagons classics. Pel moment es un servici, deficitari a la SNCF, que los industrials presan gaire. La manca de regularitat e de rapiditat es en causa. Mas i a tanben la modernizacion dels lòcs ont se pòdon cargar de caissas suls trens, l’intermodal. Cal investir dins los pòrts per aquò far.

Lo govèrn prepausa tanben de crear çò qu’apela « d’operators ferroviaris de proximitat » que permetràn de far circular de merças pel ralh sus de distàncias bracas. Preveson de ne metre a l’entorn de las vilas grandas coma Bordèu, Tolosa, Clarmont d’Auvernha, Marselha, e tanben entre Nimes e Montpelhièr e quitament a Lemòtges.

Seràn de societats privadas que logaràn las vias a RFF que n’es lo proprietari. Aquelas societats utilizaràn de vias ont i a pauc de trafic. E es aquí que l’òm se pòt interrogar sus qual modernizarà aquelas vias quand n’auràn besonh ?

D’unas son estadas modernizadas per las regions e an un petit trafic TER. Mas sembla que i aja una tendéncia a voler donar la prioritat a las merças valent a dire que quand los TER seràn pas pro emplenats calrà daissar la prioritat al tranpòrt de merças. Òm passarà los viatjadors sus d’autobusses.

Se pausa de tota faiçon la capacitat de las vias a suportar aquel trafic novèl. Calrà d’investiments e se l’Estat ditz que portarà 7 miliards es probable que serà pas pro. Qual pagarà çò que mancarà ? I a un risc de veire un còp de mai las collectivitats sollicitadas.

Cal tanben ajustar que se desvoloparà un servici de trens rapides (TGV) per las merças. S’agís de remplaçar de transpòrts que se fan ara per avion en prepausar de transpòrts rapides per tren, entre diferents aeropòrts.

La sola question qu’es benlèu pas pausada dins aquel projècte es la de saber se l’òm poirà respondre a la creissença del trafic prevista. Seriá benlèu mai prudent de pensar un biais de redusir lo transpòrt en se meteis e de veire çò qu’es necessari de transportar e çò qu’es pas indispensable de far passar d’un costat a l’autre de l’exagòne, o de l’Euròpa, pendent la nueit.

David Groslaude – La Setmana

Répondre

XHTML: You can use these tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>