Transpòrts : la LGV Tours-Bordèu inaugurada uèi (28/02/17)

Dins La Setmana 28/02/2017

Inaugurada oficialament uèi pel president de la Republica, la linha a granda velocitat religant Bordèu a Tours serà mesa en servici pel mes de julhet.

Fa vint-e-cinc ans qu’aquel projècte es dins totes los esperits. Calrà esperar 2012 per que las òbras comencen e cinc meses per que los viatjaires la pòscan utilizar. François Hollande s’es desplaçat a Villognon (Charanta maritima) per inaugurar aquel tròç que met la metropòli bordalesa a doas oras de la capitala francesa. Se poiràn far 33,5 anars-tornars dont 18,5 sens arrèst. Estimadas a 6,2 miliards d’euros, las òbras foguèron titanèscas compte tengut del grand nombre de comunas traversadas (117) e dels obratges d’art (415) dont lo viaducte passant Dordonha.

Demòra la question de son esperlongament en delà de Bordèu. Deu normalament davalar duscas a Espanha e tanben religar Bordèu a Tolosa. Lo 30 de setembre de 2016, de senators se son interrogats, pel biais d’un rapòrt, sus l’interès del finançaments de las linhas a granda velocitat. I aguèron quitament d’incertituds tocant al finançament de la quita linha entre Bordèu e Tours a qualques meses de la fin de las òbras. Per çò qu’es de las doas brancas meridionalas de la linha, los senators an estimat que lo finançament de projèctes de ligason entre Bordèu, Tolosa, Dacs, Peitieus, Lemòtges e Montpelhièr son « excessius ».

Demandèron lo repòrt de lor bastison pendent al mens una quinzena d’annadas. Prepausèron en contra d’investir massissament dins lo renovèlament del malhum ferroviari existent a nautor de 2 miliards d’euros per an. Levat que l’Estat e la SNCF i consacran ja 2,5 miliards e que lo govèrn promet de passar a 3 miliards d’aicí 2020.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *